តាមរយៈការលើកឡើងរបស់ប្រមុខរដ្ឋាភិបាលដូច្នេះ ត្រូវគេមើលឃើញថាជារបត់មួយថ្មីបន្ថែមទៀតជាពិសេសពាក់ព័ន្ធនឹងវិស័យការងារកម្ពុជា គឺជាលើកដំបូងហើយ ដែលប្រមុខរដ្ឋាភិបាល តាមរយៈក្រសួងការងារ និងបណ្តុះបណ្តាលវិជ្ជាជីវៈ រួមនឹងស្ថាប័នពាក់ព័ន្ធផ្សេងទៀត មានការគិតគូរដល់សុខទុក្ខ និងបញ្ហាចោទរបស់ពលករខ្មែរនៅក្រៅប្រទេស មិនត្រឹមតែកម្មករនៅក្នុងប្រទេសនោះទេ។ ជាទូទៅការដែលប្រមុខរដ្ឋាភិ បាលកម្ពុជាបង្ហាញនូវសុឆន្ទៈដ៏ម៉ោះមុតក្នុងការធ្វើឲ្យប្រសើរឡើងនូវសេវាកម្មធ្វើលិខិតឆ្លងដែនដល់ៗទីកន្លែង ដែលពលករស្នាក់នៅ និងធ្វើការឯក្រៅប្រទេសដូច្នេះ វាជាការឆ្លុះបញ្ចាំងនូវទំនុកចិត្តដ៏ខ្ពស់ និងការយកចិត្តទុកដាក់ដ៏ធំធេងទៅលើតម្លៃនៃកម្លាំងពលកម្ម ខណៈដែលរដ្ឋាភិបាលថ្មីទើបតែចេញដំណើរមិនដល់មួយខែផង។

ជាការពិត ការសម្រេចអនុញ្ញាតឲ្យក្រសួងការងារ ក្រសួងការបរទេស ក្រសួងមហាផ្ទៃរួមនឹងស្ថាប័នពាក់ព័ន្ធសហការគ្នាផ្តល់លិខិតឆ្លងដែនដល់ពលករនៅក្រៅប្រទេសដល់កន្លែងពួកគេធ្វើការតែម្តងនោះ គឺជាគុណសម្បតិមួយដ៏ធំធេង និងជាការផ្តល់ផលប្រយោជន៍ដ៏ក្រាស់ក្រែលសម្រាប់ពលករកម្ពុជា ដែលធ្វើចំណាកស្រុកទៅធ្វើការនៅបរទេស។

តួយ៉ាងដូចជានៅប្រទេសកូរ៉េខាងត្បូងជាដើម ដែលជាការចាប់ផ្តើមមុនគេនេះ គឺពិតជាជួយសម្រួលដល់ពលករខ្មែរដ៏ច្រើនមិនអាចប្រកែកបាន ខណៈពលករខ្មែរនៅកូរ៉េខាងត្បូងប្រមាណ៦ម៉ឺននាក់នឹងទទួលបានអត្ថប្រយោជន៍នេះយ៉ាងពិតប្រាកដ។ ផលប្រយោជន៍ដែលពលករខ្មែរទទួលបាននោះគឺការជួយបង្កើនប្រាក់ចំណូលដល់ពួកគេបន្ថែមទៀត នៅពេលដែលការចំណាយមួយចំនួនរបស់ពលករមិនត្រូវបានបាត់បង់តាមរយៈយន្តការថ្មីរបស់ប្រមុខរដ្ឋាភិបាល។

តាមសភាពជាក់ស្តែងពលករម្នាក់ៗ ដែលកំពុងស្នាក់នៅ និងធ្វើការនៅប្រទេសកូរ៉េ ពិតជាមានភាពចាំបាច់នឹងត្រូវការជំនួយពីរាជរដ្ឋាភិបាល ដោយហេតុថាពួកគេមានការលំបាកក្នុងការធ្វើលិខិតឆ្លងដែនថ្មី ខណៈដែលលិខិតឆ្លងដែនចាស់អស់សុពល ភាព និងមិនអាចពន្យាបាន ហើយត្រូវចំណាយពេលវេលា និងថវិកាធ្វើដំណើរត្រលប់មកប្រទេសកម្ពុជាវិញ ដើម្បីធ្វើលិខិតឆ្លង ដែនថ្មី និងឯកសារផ្សេងៗទៀត ដូចជាលិខិតថ្កោលទោសជាដើម។

មួយវិញទៀត ការដែលត្រូវចាកចេញពីកន្លែងធ្វើការមួយរយៈ ក៏ព្រោះតែដើម្បីវិលត្រលប់ទៅប្រទេស កំណើត ដើម្បីធ្វើលិខិតឆ្លងដែន និងលិខិតស្នាមផ្សេងៗ មិនមែនជាការងាយ ស្រួលទេ។ ពលករខ្លះបានប្រឈមនឹងការសុំអនុញ្ញាតច្បាប់តឹងតែងពីនិយោជកសហគ្រាស ក្រុមហ៊ុន ឬកសិដ្ឋាន ដោយគេបារម្ភថាអវត្តមានរបស់បុគ្គលិកច្រើន នឹងធ្វើឲ្យប៉ះពាល់ដល់ច្រវ៉ាក់ផលិតកម្មរបស់គេ។ ពេលខ្លះនិយោជកអាចនឹងកាត់ប្រាក់ខែក៏មាន។

ក៏ប៉ុន្តែបញ្ហាលំបាកទាំងនេះ នឹងលែងមានទៀតហើយ ហើយនឹងត្រូវបានដោះស្រាយតាមរយៈការសម្រេចចិត្តប្រកបដោយគតិបណ្ឌិត និងការគិតគូរដ៏ធំធេង របស់ប្រមុខរដ្ឋាភិបាលកម្ពុជាលោកបណ្ឌិត ហ៊ុន ម៉ាណែត។ ដូច្នេះការដាក់ការរិយាល័យនៅតាមទីតាំងការងារពលករ ដែលមានចំងាយរាប់ពាន់គីឡូម៉ែត្រពីមាតុប្រទេស ដើម្បីធ្វើលិខិតឆ្លងដែនដល់ពលករនៅប្រទេសកូរ៉េពេលនេះ គឺជាសក្ខីភាពបង្ហាញពីការយកចិត្តទុកដាក់របស់រាជរដ្ឋាភិបាលបន្ថែមទៀត បន្ថែមពីលើការប្រឹងប្រែងរបស់រាជរដ្ឋាភិបាលក្នុងការជួយរកការងារឲ្យពលរដ្ឋរបស់ខ្លួនធ្វើនៅក្រៅប្រទេស ដើម្បីបង្កើនប្រាក់ចំណូលសម្រាប់សេដ្ឋកិច្ចគ្រួសារ។

អតីតអ្នកការទូត ក៏ដូចជាអ្នកតាមដានសង្គមនានាយល់ឃើញប្រហាក់ប្រហែលគ្នាថា ការសម្រេចចិត្តរបស់លោកបណ្ឌិត ហ៊ុន ម៉ាណែត គឺជាកាយវិការដ៏ឈ្លៀសវៃមួយ ដែលបង្ហាញនូវការប្តេជ្ញាចិត្តខ្ពស់នៅចំពោះមុខពលរដ្ឋម្ចាស់ឆ្នោត និងប្រជាជាតិខ្មែរទាំងមូលថារាជរដ្ឋាភិបាលថ្មីដែលដឹកនាំដោយអ្នកបន្តវេនគណបក្សប្រជាជនកម្ពុជាពិតជាមានសមត្ថភាព និងគុណភាពក្នុងការដឹកនាំ និងដោះស្រាយនូវបញ្ហាប្រឈមនានារបស់ពលរដ្ឋខ្មែរទាំងនៅក្នុង និងក្រៅប្រទេស។

ទោះយ៉ាងណា យន្តការបង្ខិតសេវាលិខិតឆ្លងដែនទៅកៀកនឹងកាំជណ្តើររបស់ពលករ ដែល ប្រមុខរដ្ឋាភិបាលកម្ពុជាបានដាក់ចេញពេលនេះ ត្រូវបានគេមើលឃើញថាមិនអាចគេចផុតពីការរិះគន់ពីសំណាក់ពួកប្រឆាំងផ្កាប់មុខមួយចំនួនតូចថាធ្វើឡើងក្នុងគោលបំណងកេងចំណេញនយោបាយ។ ក៏ប៉ុន្តែអ្នកតាមដានសង្គមនានា ក៏ដូចជាអតីតអ្នកការទូតយល់ឃើញថា ដើម្បីប្រយោជន៍របស់ពលរដ្ឋ និងសង្គម ទោះជារងនូវការវិនិច្ឆ័យដោយអយុត្តិធម៌យ៉ាងណា ក៏រាជរដ្ឋាភិបាលមិនរាថយដែរ។

តាមពិតទៅ ការរំកិលសេវាទៅកៀកពលករខ្មែរនៅក្រៅប្រទេស មិនមែនជារូបភាពនយោបាយអ្វីទេ ផ្ទុយទៅវិញ វាជាការប្រឹង ប្រែងរបស់រដ្ឋាភិបាលក្នុងការយល់ដឹង និងទទួខុសត្រូវពីសុខទុក្ខរបស់ប្រជាពលរដ្ឋ ហើយខិតខំកែលម្អ និងដាក់ចេញនូវគោល នយោបាយឲ្យប្រសើរជាងមុន។

ដូច្នេះតាមរយៈការចាប់ផ្តើមការរំកិលការធ្វើលិខិតឆ្លងដែននៅដល់ទីកន្លែងធ្វើការរបស់ពលករជាលើកដំបូងនៅកូរ៉េខាងត្បូង ពលករខ្មែរនៅប្រទេសផ្សេងទៀតក៏បានសម្តែងការគាំទ្រ ហើយក៏ទន្ទឹងរង់ចាំយ៉ាងអន្ទះសារផងដែរនូវយន្តការថ្មី ដែលដាក់ចេញដោយប្រមុខរដ្ឋាភិបាលថ្មី ហើយនេះបង្ហាញពីលទ្ធផល និងការតបស្នងដែលបានកើតឡើងពីការគាំទ្រយ៉ាងភ្លូកទឹកភ្លូកដីពីប្រជាពលរដ្ឋកាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ។

តាមការឲ្យដឹងពីក្រសួងការងារ និងបណ្តុះបណ្តាលវិជ្ជាជីវៈ ពលករកម្ពុជាប្រមាណជាង១,៣លាននាក់ បាននិងកំពុងបំរើការងារនៅក្រៅប្រទេសចំនួន៧ ក្នុងនោះមានថៃ កូរ៉េ ជប៉ុន សិង្ហបុរី ហុងកុង និងអារ៉ាប៊ីសាអ៊ូឌីត ក្នុងនោះប្រទេសថៃមានពលករខ្មែរច្រើនជាងគេ ដល់ទៅជាង ១,២លាននាក់។ ក្នុងមួយឆ្នាំៗ ពលករខ្មែរដែលបានទៅធ្វើការនៅក្រៅ ប្រទេសទាំងអស់នេះ បានបញ្ជូនប្រាក់ទៅកាន់ក្រុមគ្រួសាររបស់ពួកគេនៅក្នុងប្រទេសប្រមាណជិត ៣ពាន់លានដូល្លារអាមេរិក។

ជាសរុបមកការរំកិលសេវាធ្វើលិខិតឆ្លងដែនសម្រាប់ពលករដល់ទីតាំងដែលពួកគេធ្វើការនៅក្រៅប្រទេស គឺជាយន្តការមួយដែលមានការសាទរដ៏ច្រើនលើសលប់ ដែលយន្តការនេះជាសញ្ញាមួយបង្ហាញថាការចេញដំណើររបស់រាជរដ្ឋាភិបាលថ្មីក្រោមការដឹកនាំរបស់លោកបណ្ឌិត ហ៊ុន ម៉ាណែត ពិតជាការចេញ ដំណើរមួយប្រកបដោយភាពត្រឹមត្រូវ មានភាពប្រាកដនិយមច្រើន ដែលលទ្ធផលទាំងអស់នេះស្តែងឲ្យឃើញពីសមត្ថភាពពិតរបស់អ្នកដឹកនាំវ័យក្មេងរបស់គណបក្សប្រជាជនកម្ពុជាប្រកបដោយគុណភាព៕

ដោយ៖ ស៊ុន សុវណ្ណនរិន្ទសូរ្យ